Shkruan: Astrit Gashi
Ramadan Muja i Prizrenit, nuk më ngjanë se ka probleme vetëm me ligjin- të cilin e shkeli dhe për këtë e dënoi gjykata- por ai sot tregoi se ka problem edhe me “common sense” pra me logjikën e shëndoshë.”Plaku i artë” i PDK-së për Prizrenin, të martën, vendosi që ta “pezulloj” veten nga detyra e kryetarit të Prizrenit.
I madh e i vogël u quan të thonë se kjo është shkelje e ligjit, në mesin e tyre përmes një zyrtari të lartë u shpreh për Gazetën Blic (www.gazetablic.com) edhe Ministria e Administrimit të Pushtetit Lokal, që tha se ligji u shkel.
Nuk ka asnjë dyshim se me ligj një udhëheqës, një i emëruar ka vetëm dy opsione: dorëheqjen ose shkarkimin.
Meqenëse ligji nuk është një shpikje jashtëplanetare, provizionet e tij bazohen ndër tjerash në “common sense”.
Pra ne diçka që bënë, që është e bëshme, që ka rrjedhë e ka arsyetim- në diçka që është thjeshtë normale dhe e zakonshme, e logjikshme- pra tokësore dhe jo diçka laboratorike.
Muja i Prizrenit, i zënë në mes nga Thaçi që i kërkoi të mos tërhiqej nga kryetari dhe frika se mund të detyrohet nga protestat qytetare që të lë postin, gjeti një gjysme zgjidhje- tha po e pezulloj postin e kryetarit.
Po çfarë veprimi i pa logjikshëm ishte ky “pezullimi” se! Nuk mundet askush të ja pezulloj postin vetes për një kohë të caktuar. Po të ekzistonte kjo mundësi jam i bindur që shumëkush, përfshirë edhe Thaçin do ta pezullonte detyrën e kryeministrit për ndonjë javë e muaj- dhe thjeshtë të ikte diku për pushime. Apo ta zëmë edhe kolegu im Arben Ahmeti, ishte për nja 1 muaj nga detyra e redaktorit përgjegjës të Tribunës, edhe ish dal në protesta kundër Mujës në Prizren, ta zëmë. Plus që rroga i kish ecë.
Pra “common sense” apo logjika e shëndoshë se rrokë që të “vet-pezullohesh” aq sa nuk e rrokë as që të “ vet-përjashtohesh”.
Njeriu për veten e tij mund të vendos vetëm të shkoj, pra të dorë-hiqet. Për pezullim ashtu si edhe për përjashtim, atëherë kur e lejon ligji- mund të vendos vetëm dikush tjetër.
Muja e ka duplifikuar veten!
Këtë punën e “pezullimeve” e mbajë mend si një shpikje të UNMIK-ut. Por as edhe te ata ajo nuk vlente për zyrtarë politik e të emëruar, por kryesisht për disa drejtorë e punëtorë të Ndërmarrjeve Publike, që prokuroria kishte nisur hetime, jo gjykim dhe për të cilët besohej se ndjekja nuk ishte konfirmuar dhe gjykohej e padrejtë. Këtyre për me u përshtatë me qeverisjen moderne të korporatave, vendosej tu pezullohej detyra deri në përfundim të hetimeve.
Gatë pezullimit ata herë paguheshin e herë jo. Por sapo që të konfirmohej akuza, të mos flasim për vendime gjyqësore- pezullimi ndërpritej, ndërsa përjashtimi ishte punë e kryer.
Ramadan Muja, thjeshtë nuk është dashtë me ra kaq poshtë edhe personalisht. U dashtë me bë atë që do të detyrohet ta bëjë, pra të dorë-hiqet.
Si përkujtim as ish- rektori Ibrahim Gashi nuk donte të dorë-hiqej- dhe atij Kryeministri i kërkonte të rrinte…por vetëm deri në një moment.
E di që Prizreni për Thaçin është si Jerusalemi- prandaj edhe donte ta mbante me çdo kusht Mujën- edhe të vet-përqeshur. Për ta mbajtur Jerusalemin e ka.
Por, nuk e besoj që Prizreni do të ulë kokën dhe do të pranoj që në krye të qytetit ta ketë një të dënuar nga Gjykata. Ta mbajë sot në krye të tij, atë që pikërisht për shkak të gjykimit nuk është dashur ta zgjedhë pikësëpari.
Në Kosovë, kemi pranuar e kemi duruar shumëçka mund të thotë ndonjëri- por, Prizreni nuk e ka për obligim me na përcjellë.
Adios Ramadan Muja!
Në histori ke me hy jo vetëm si shkelës I ligjit- por ndoshta edhe si i “vet-pezulluari” i parë dhe i vetëm i politikës kosovare./Gazeta Blic/