Politika ka nisur t’i joshë me të madhe biznesmenët kosovarë. Çdo vit radhëve të partive politike u shtohen me dhjetëra afaristë.
Edhe në listat e publikuara tashmë për zgjedhjet e 8 qershorit zënë vend emrat e një numri të konsiderueshëm të pronarëve të kompanive të fuqishme në vend.
Më së shumti me këta kandidatë janë “begatuar” listat e tri partive të mëdha, PDK, LDK e AAK, pa përjashtuar as biznesmenët që kanë aderuar në Vetëvendosje e AKR.
Kjo e fundit madje në opinion njihet si parti e biznesmenëve, pasi lideri i saj është multimilioner. Në Partinë Demokratike të Kosovës janë të përfshirë tregtarë e pronarë të marketeve, drejtues të medieve dhe tregtarë të produkteve ushqimore.
Në LDK e AAK dominojnë pronarë të derivateve dhe ndërtimtarë. Ndërkaq, në partitë tjera shihet një laramani emrash të biznesmenëve të njohur kosovarë.
Ndër emrat më të njohur të biznesit që ka në listën e vet Partia Demokratike e Kosovës është Ramiz Kelmendi, i cili është pronar i kompanisë “Elkos Group” dhe rrjetit të marketeve “ETC”. Ai në një prononcim për gazetën ka thënë se qëllimet edhe vizionet e tij si biznesmen ka vendosur t’i realizojë edhe përmes politikës.