Zgjedhjet për Parlamentin Studentor në Universitetin e Prishtinës që u mbajtën të enjten, janë përcjellë me akuza për parregullsi të ndryshme.
Në disa fakultete ato janë mbajtur edhe nën kujdesin e policisë.
Në Fakultetin Juridik, studentët kanë treguar se disa kolegë të tyre kanë tentuar të bllokojnë dy nga tri qendrat e votimit të këtij fakulteti.
“Disa kolegë nga një organizatë studentore kanë tentuar të mbyllin dyert e korridorit ku janë dy qendra të votimit, me arsyetimin se votuesit e tyre nuk gjenden në lista, dhe pasi që ata s’po mund të votojnë, atëherë nuk do të votojnë as studentët e tjerë”, ka thënë për “Kohën Ditore”, Bledar Gashi, student në Fakultetin Juridik. Sipas tij, pastaj kanë ndërhyrë policia dhe sigurimi i Fakultetit, duke i larguar studentët që tentonin t’i mbyllin dyert. Nuk ka pasur të arrestuar.
Gazeta ka qenë prezent në vendin e ngjarjes kur pjesëtarë të sigurimit kanë ndërhyrë për të mbajtur rendin, për një kohë, para qendrës numër 1 të votimit, në Fakultetin Juridik