Lidhja Demokratike të Kosovës ka paralajmëruar për nesër një konferencë për media, ku sipas disa shkrimeve thuhet se në këtë konferencë do të bëhet publike kalimi i disa degëve të Aleancës për Ardhmërinë e Kosovës në LDK.
Mirëpo nuk është specifikuar se degët e cilës komunë kanë vendosur të kalojnë në LDK.
I kontaktuar nga Indeksonline, Avni Arifi këshilltari i lartë i liderit të AAK-së, Ramush Haradinaj ka thënë se nuk e di se për cilat degë bëhet fjalë, dhe se nuk mundet ta konfirmojë kush do të largohet nga AAK-ja.
“Ne me vendimin që kemi marrë për shpërbërje të strukturave dhe me shkuarjen në zgjedhje e kemi bërë sepse në disa degë në komunat e Kosovës, në zgjedhjet e fundit kemi pasur rezultate zhgënjyese”, ka thënë Arifi.
Ai më pas ka theksuar se disa anëtarë të degëve të AAK-së të cilët në zgjedhjet e kaluara kanë pasur rezultate të dobëta, po e shfrytëzojnë kohën që të largohen nga AAK-ja para se ti largojë procesi zgjedhor.
“Shembull ishte Vitia që tradicionalisht kemi pasur mbi 2000 vota por në zgjedhjet e fundit kishim rënie në 400-500 vota. Ata të cilët sigurt do të largoheshin shfrytëzuan këtë kohë parazgjedhore se kinse pe lëshojmë AAK-në”, është shprehur Arifi.