Policia në Prizren duket se ka bërë hapin e parë për zbardhjen e plagosjes misterioze të dy personave, nga ana e tre të dyshuarve, të veshur me rroba të babadimrit, që ndodhi një javë më parë në argjendarinë “Saraç Gold” në qendër të qytetit.
Dy nga tre personat tashmë të arrestuar, të njohur për policinë, dyshohet të jenë pjesëmarrës të skenarit të “babadimrave hajdut” të Tiranës, që në prag të mbylljes së vitit reprizuan një skenar të tillë edhe në Prizren.
Arrestimin e tyre e konfirmuan edhe vetë autoritetet policore. Drejtori rajonal i policisë në Prizren, nënkoloneli Nexhmi Krasniqi, tha për “Zërin” se në kontekstin e hetimeve të bëra pas ngjarjes janë arrestuar tre persona nga Prizreni, dy prej të cilëve dyshohet të jenë ndërlikuar në plagosjen që ndodhi në argjendari.
“Policia po bën hetime këmbëngulëse rreth zbardhjes së ngjarjes, por në këtë fazë ka vështirësi, sepse autorët e tentim-plaçkitjes që përfundoi me plagosje ishin të maskuar me rroba të babadimrit”, tha ai duke treguar se të arrestuarit gjatë deklaratave të bëra në polici, kanë treguar përvojë në dhënie të deklaratave, duke mohuar mundësinë e pjesëmarrjes.
Nënkoloneli Krasniqi tha se të arrestuarit ngjajnë me përshkrimin e dhënë nga viktimat, sa i përket gjatësisë trupore, prej 1.9 metra.
Tre personat e maskuar si babadimra, pak pas orës nëntë të paradites së 26 dhjetorit, përderisa tentuan ta plaçkitin argjendarinë “Saraç-Gold” plagosën pronarin e lokalit Lutfi Ahmetin dhe fqinjin e tij, Besim Ymeri, pronar i një dyqani të afërt që në momentin kritik qëlloi mysafir, derisa rezistuan ta pengojnë skenarin e plaçkës.
Ngjarja ndodhi në këndin mes katër rrugësh, përballë hamamit “Gazi Mehmet Pasha” të Prizrenit, në një pamje të dukshme, ndërsa njëri nga babadimrat mbante pistoletë, të cilën e përdori kur qëlloi në këmbë viktimat.
E tërë ngjarja është përshkruar të këtë ndodhur brenda tre sekondash, në hyrje të argjendarisë, ndërsa pas aktit të dyshuarit ashtu të maskuar kanë ikur nga vendngjarja duke ecur këmbë, përmes disa rrugicave të afërta.
Si provë materiale në vendin e ngjarjes janë gjetur dy gëzhojat e pistoletës, të cilat në polici thanë se po analizohen me kujdes.
Të arrestuarit, emra të njohur për policinë
Bashkëshortja e pronarit të dyqanit ku edhe ndodhi rasti, që kishte parë ngjarjen nga afër, tregoi për “Zërin” se “babadimrat” sapo kanë hyrë në dyqan kishin bërtitur, duke paralajmëruar për plaçkë dhe me siguri edhe për të krijuar huti e frikë, ndërsa burri kishte reaguar, ndërsa ishte ndihmuar edhe nga fqinji Besimi, e pikërisht këtu ndërsa ishte shkrepur arma.
Zëdhënësi rajonal i policisë në Prizren, Hazir Berisha, tha se tre të arrestuarit e dyshuar, janë të njohur për policinë.
Në kuadër të hetimeve për zbardhjen e rastit, nga burime policore jo zyrtarisht merret vesh se një ditë, para se të ndodh ngjarja, në qendrën tregtare “ETC” në Prizren në dy raste janë blerë rroba të babadimrave.
Një persona ka paguar dy palë, përderisa një tjetër kishte blerë një palë rroba. Policia dyshon se kjo mund të jetë shumë e ndërlidhur me ngjarjen që ndodhi në argjendari, por që në momentin e pagesës, kamerat e sigurisë kanë qenë jashtë funksionit, andaj edhe nuk mund të thuhet diçka konkrete rreth identifikimit të klientëve, të cilët mund të jenë të ndërlikuar në këtë rast. Policia në Prizren ka kërkuar ndihmë nga qytetarët për identifikimin e të dyshuarve.