“Arte mediale” është një libër i botuar së fundmi nga autori Valmir Tertini, i cili për dashamirët e artit sjell botimin e tretë nga vetë ai. Ky libër vjen i ndarë në katër kapituj, ku secili prej tyre është i ndërlidhur me njëri-tjetrin, por që përmban diçka të veçantë.
Kapitulli i parë i librit “Arte mediale”, ka të bëjë me fotografi, dhe përmban një shkrim për shkrepjen e Kevin Carter, i cili pasi realizoi këtë fotografi bëri vetëvrasje.
Kapitulli i dytë është filmi, që përmban ese për filmin. Nga filmat që njihen si ABC-ja e historisë së kinematografisë, tek ata që bënë revolucion, e deri tek filmat e kohës sonë.
Kapitulli i tretë flet për televizionin, përmban kolumnet reale të kohës, të cilat kanë pasur lexueshmëri dhe janë publikuar në të gjitha vendet ku flitet shqip.
E kapitulli i katërt është për libër, ai përmban dy shkrime për dy nga shkrimtarët më të mëdhenj shqiptarë: Ismail Kadare me librin “Kronikë në gur” dhe At Gjergj Fishta me “Mrizin e zanave”.
Të gjithë këta kapituj vijnë si përmbledhje esesh, të shkruara gjatë studimeve të vet autorit, i cili tregoi se nuk e quan veten shkrimtar, sepse nuk ka të kryer diçka çka i përket letërsisë, por që, sipas tij, e kanë vlerësuar njerëz të kësaj fushe.
“Është vështirë të bëhesh kritik në kohën e studimeve. Andaj, shpresoj se këtë libër do ta kuptoni si një hap për të sjellë diçka më të re në fushën e arteve mediale, ku ka mungesë të literaturës në gjuhën shqipe dhe kërkohet shumë për të bërë”, theksoi Tertini.
Redaktori i këtij libri, Gani Mehmetaj, vlerësoi lart shkrimet e autorit, që kanë frymëzim, emocion e përkushtim. Ai tha se në esetë e trajtuara Valmir Tertini merret me letërsi, ese për filmin dhe trajtime tematike-eseistike për televizionin.
“Derisa në letërsi shkruan për emrat e njohur të letërsisë shqiptare e botërore, në kinematografi analizon disa filma të cilët e kanë provokuar atë si autor dhe shikuesin në përgjithësi, sikurse që analizon edhe disa filma që kanë lënë gjurmë në kinematografinë botërore.
Ndërkaq, shkrimet për televizionin pos tonit herë-herë sarkastik, ai u rreket temave që janë aktuale, por që njëkohësisht e preokupojnë jo vetëm lexuesin, por edhe shikuesin i cili konsumon vlera, apo antivlera nga mediet elektronike. Shpresojmë që sprovat e para do të priten me kureshtje nga lexuesit, ashtu sikurse që besojmë se Tertini nuk do të mjaftohet vetëm me këtë libër”, u shpreh Mehmetaj.
“Arte mediale” është botuar nga libraria “Artini”, ku autori Valmir Tertini artdashësve u sjell kontributin e tij në trajtimet letrare, filmike e televizive.