Kandidati për kryetar të Komunës së Prizrenit nga radhët e Bashkimit Demokratik, Zafir Berisha, i shoqëruar nga bartësi i listës Osman Hajdari dhe kandidatët për Kuvend Komunal, Shqipe Bytyqi dhe Shani Berisha, kanë takuar banorët e fshatit Billushë (Kushtrim).
Berisha në vendlindjen e tij tha se edhe 100 vjet jetë më pasë, nuk do heq dorë nga angazhimi i tij për bërjen e shtetit ligjor dhe demokratik të Kosovës.
“Premtimi më i madh që mund ta bëj në vendlindjen time është se do të mbetem Zafir Berisha, i cili të mirën dhe të keqën në të gjitha kohët e kemi ndarë së bashku dhe iu garantoj se edhe 100 vjet jetë me i pasë, nuk do heq dorë nga angazhimi im për bërjen e shtetit ligjor dhe demokratik të shtetit të Kosovës, shtet të cilit po i rrezikohet perspektiva evropiane nga krimi dhe korrupsioni”, tha Berisha.
Sipas tij, ardhja e Bashkimit Demokratik në pushtet në Komunën e Prizrenit dhe Dragashit nënkupton fundin e klasës politike e cila po e degradon qytetin e Prizrenit me ndërtime dhe mbindërtim, e cila e ka sjellë buzë greminës sociale qytetarin e Prizrenit dhe Kosovës, andaj
“Për ne ashtu edhe si me parë është obligim që për t’i dalë zot këtij vendi dhe për ti kthyer krenarinë qytetarëve këtij vendi”, tha Berisha, duke kërkuar nga të pranishmit që të dalin në mënyrë masive në zgjedhje dhe me votën tyre ta pensionojnë garniturën aktuale politike.
Kurse, bartësi i listës Osman Hajdari, tha se banorët e Billushës duhet të ndihen krenarë që kanë bashkëfshatar të tyre Zafir Berishën i cili është i gatshëm që në të gjitha kohërat të jetë afër interesave të qytetarëve. Ndërkaq kandidatët për asambleistë nga ky lokalitet Shqipe Bytyqi dhe Shani Berisha, premtuan që do të jenë zë i fuqishëm i qytetarëve të kësaj ane në Komunën e Prizrenit./PrizrenPress.com/