Ministri i Arsimit, Ramë Buja, mori pjesë sot në ceremoninë përmbyllëse të projektit “Trajnimi i Mësimdhënësve, Ngritja e Kapaciteteve për Komunat dhe Drejtorët e Shkollave”, i cili është financuar nga Bashkimi Evropian.
Buja theksoi se sukseset në reformimin e Fakultetit të Edukimit dhe trajnimit të mësimdhënësve janë inkurajuese, ndërkaq shtoi se Fakulteti i Edukimit është shtylla e gjithë Universitetit Publik “Hasan Prishtina” dhe më gjerë.
Duke folur për rëndësinë e projektit“Trajnimi i Mësimdhënësve, Ngritja e Kapaciteteve për Komunat dhe Drejtorët e Shkollave”, ministri Buja vlerësoi se projekti është realizuar me sukses dhe në funksion të realizmit të synimeve të Ministrisë së Arsimit, sa i përket ngritjes së cilësisë dhe reformimit të Fakultetit të Edukimit.
Ndërsa, Christof Stock, udhëheqës i sektorit për bashkëpunim në Zyrën e BE-së, tha se ky projekt ka qenë një shembull i mirë i bashkëpunimit në mes të përfituesve siç janë: Ministria e Arsimit, Fakulteti i Edukimit, komunat, shkollat dhe partnerëve donatorë, GIZ dhe USAID, ndërkaq është shprehur i gatshëm që të vazhdohet ky nivel i bashkëpunimit dhe me projekte të tjera të ngjashme, në funksion të ngritjes së cilësisë në arsim.
Dekani i Fakultetit të Edukimit, Ethem Çeku, nga ana e tij tha se, Fakulteti i Edukimit po e merr rolin që i takon, në zhvillimin e mësimdhënësve në sistemin parauniversitar.