Negociatat në Bruksel i sollën favore vetëm Serbisë
Opozita dhe analistët politikë konsiderojnë se marrëveshjet e tanishme, në dëm të shtetit të Kosovës, që Qeveria PDK- LDK i ka arritur në Bruksel me palën serbe, me ndërmjetësimin e BE-së, duhet të jenë të fundit në këtë proces që ka nevojë për rishikim.
“Me këtë Qeveri, me këtë përbërje të Qeverisë, kryeministrin Mustafa dhe zëvendësin e tij, Hashim Thaçi, jemi dëshmitarë që asgjë nuk është bërë deri më sot në interes të vendit, sepse Kosova humbi dhe nuk përfitoi asgjë nga këto bisedime, edhe tani e tutje, nëse ndodh një fatkeqësi që këta njerëz të vazhdojnë akoma, ne nuk mund të presim ndryshime në aspektin pozitiv”, tha deputetja Teuta Haxhiu nga AAK-ja për ‘Kosova Sot’.
Edhe Bilall Sherifi, nga Nisma për Kosovën, thotë se do të ishte një rrezikim nëse opozita dhe qytetarët nuk imponojnë ndryshime të shpejta dhe rrënjësore në qeverisjen e vendit, për qasje tjetër në bisedimet me fqinjët tanë për normalizim të marrëdhënieve, veçmas në ato me Serbinë, në të cilat Kosova është në defensivë të madhe.
“Nga “FUSNOTA”, e cila konteston pavarësinë e shtetit të Kosovës, e deri te “Zajednica”, përmes së cilës Kosova ndahet në dy njësi politike dhe territoriale, të gjitha “produktet” e bisedimeve me Serbinë e kanë dëmtuar rëndë substancën e Kosovës”, thotë ai. /Kosova Sot