Drejtori i Përgjithshëm i Policisë së Kosovës, Samedin Mehmeti, ka vizituar sot zyrtarin policor i cili u sulmua me thikë nga një i dyshuar gjatë kohës sa ishte në detyrë.
Sipas njoftimit të policisë, Mehmeti së bashku me Drejtorin e Departamentit për Operacione, Gazmend Hoxha, kanë vizituar stacionin policor në Komunën e Suharekës, ku janë pritur nga Drejtori rajonal i Prizrenit, kolonel Faton Alija.
Gjatë takimit është diskutuar për angazhimet policore në ruajtjen e rendit dhe sigurisë, rezultatet e deritanishme si dhe objektivat dhe planifikimet për vitin 2022.
Pas vizitës në stacionin policor, Mehmeti dhe Hoxha kanë vizituar zyrtarin policor i cili ditë më parë u sulmua dhe mori lëndime trupore nga një i dyshuar, gjatë intervenimit në një rast të dhunës në familje në Suharekë.
Personi i dyshuar për sulmin ndaj policit tashmë është arrestuar, ndërsa vlerësohet si recidivist i dhunës në familje por edhe veprave të tjera penale.