Komuna e Prizrenit, përkatësisht Drejtoria e Arsimit, sivjet ka hequr dorë nga planet për fillimin e ndërtimit të objekteve të reja shkollore në fshatrat Landovicë dhe Mazrrek.
Sipas arsyetimit të zyrtarëve, një gjë e tillë ndodh për shkak të mosdefinimit të pronës, shkruan sot “Koha Ditore”. Por këshilltarët e Kuvendit të Komunës konsiderojnë se për të dyja objektet pronat janë të definuara dhe se problemi kryesor qëndron te shuma shumë e ulët e mjeteve të planifikuara për këto projekte kapitale.
Mirëpo tashmë Ekzekutivit komunal ka paralajmëruar se mjetet e planifikuara nga granti qeveritar do të shkojnë në suficit, për të dyja projektet.
“Duhet cekur se projektet e shkollave në Landovicë dhe Mazrrek mbesin të pafilluara për shkak të mosdefinimit të pronës dhe vlera prej 150 mijë eurove mund të shkojë në suficit, mjete këto nga granti”, shkruan në pasqyrën e të dalave të buxhetit të arsimit të Prizrenit, për periudhën janar-shtator 2016.
Në të njëjtin paragraf sqarohet se DKA-ja ka pasur probleme objektive dhe subjektive sa i përket zbatimit të projekteve kapitale, “kështu që një pjesë e tyre nuk mund të realizohen këtë vit dhe mbeten për vitet vijuese”.