Pas shkëlqimit politik që Nexhat Daci ka pasur në vitet e pasluftës me librezë të LDK-së, “ekuacionet” e tij politike të mëvonshme dolën se janë rezultate jo të mira për një akademik të kimisë!
Nuk ka qenë pjesë udhëheqëse e politikës së LDK-së, por është bërë njeriu i dytë në pushtet falë afërsisë së tij me kryetarin e LDK-së, Ibrahim Rugovën. Daci hyri në jetën politike e institucionale të LDK-së jo si aktivist, por si kuadër i lartë i përzgjedhur nga Rugova. Përzgjedhja e tij si bartës i listës së LDK-së në zgjedhjet e para lokale, do ta bëjë emrin e tij të njohur në opinion edhe si politikan, shkruan Bota Sot.
Nga viti 2001 deri në vitin 2006, ai mori besimin e presidentit Rugova për të udhëhequr me shumë përgjegjësi postin e institucionit më të lartë në vend, atë të kryetarit të Kuvendit të Kosovës. Duke mos qenë asnjëherë anëtar i Kryesisë së LDK-së, apo i ndonjë grupimi brenda partisë, vdekjen e presidentit Rugova Daci do ta përjetonte më së rëndi.
“Kolegët” e tij do ta shkarkonin Dacin nga pozita e kryetarit, për ta vënë në ulësen e tij një personalitet tjetër nga radhët e LDK-së, Kolë Berishën. Beteja për poste të larta e ndau edhe partinë në dysh./BS/