Avokati i Fatmir Limajt, Tomë Gashi, ka thënë se qëllimisht në këtë periudhë kohore është publikuar aktakuza ndaj Limajt dhe të akuzuarve të tjerë në rastin e “MTPT”-së.
Në një intervistë për “Epokën e re”, ai ka thënë se qëllimi i EULEX-it është që vazhdimisht ta mbajë të shantazhuar Fatmir Limajn.
“Nuk është e rastësishme që tash është caktuar vlerësimi i ankesës së prokurorit në rastin ‘Kleçka’ si dhe është dërguar kjo aktakuzë me përmirësime të caktuara, që i bie se për një periudhë kohore prej tre vjetësh EULEX-i ka mundur qëllimisht ta mbajë këtë aktakuzë dhe në momentin që i është dukur e përshtatshme, ta dorëzojë tek Gjykata Themelore. Qëllimi i EULEX-it është që vazhdimisht ta mbajë të shantazhuar Fatmir Limajn”, ka deklaruar Gashi, duke shtuar se nuk është e rastësishme që aktakuza është publikuar në kohën kur liderët opozitarë kanë paralajmëruar protesta gjithëpopullore. Në këtë kontekst, ai nuk e ka përjashtuar mundësinë e ndikimit të politikës në këtë rast.
“Nuk mund të them se ka prova se politika ka ndikim, por sigurisht nuk është e rastësishme që është bërë publike kjo aktakuzë tani kur po kundërshtohet procesi i dialogut me Serbinë, përkatësisht nënshkrimi i marrëveshjeve të arritura së fundmi në Bruksel. Fatmir Limaj, si pjesë e opozitës, së bashku me Ramush Haradinajn dhe Visar Ymerin, kanë paralajmëruar se në çaste të përshtatshme do të organizojnë protesta gjithëpopullore kundër nënshkrimit të marrëveshjes për krijimin e asociacionit të komunave me shumicë serbe”, ka theksuar Gashi.
Ai ka vlerësuar se EULEX-i me këto veprime po tenton ta paraqesë si të suksesshëm përfundimin e punës në Kosovë.
“Kohët e fundit EULEX-i është duke përdorur taktika të publikimit të punës së vet. Kështu që, publikimi i kësaj aktakuze dhe dhënia e një peshe të caktuar në medie nga ana e EULEX-it tregon se ky mision dëshiron të paraqesë se, kinse, me sukses është duke u përfunduar puna e tij në Republikën e Kosovës, e që unë mendoj se është krejtësisht e kundërta”, është shprehur Gashi.