Ka pritur gjatë kthimin e trupave të familjarëve, por 15 vjet pas, Gramoz Berisha, mashkulli i vetëm i mbijetuar në masakrën ndaj familjes Berisha në Suharekë, ka thënë se nuk e ka menduar kështu këtë ditë.
Në ceremoninë ku ka varrosur vetëm gjysmën e familjarëve, Gramoz Berisha, ka thënë se kjo nuk është Kosova që e deshën familjarët e tij.
“Unë nuk e kam pritur që kjo ditë të jetë kështu. Nuk kam pritur që të jetë e përgjysmuar. Pas 15 vjetësh ne ende jemi vetëm në gjysmë të rrugës. Në gjysmë të rrugës për të ndërtuar Kosovën që e deshën familjarët tanë që nuk janë më, në gjysmën e rrugës për të ndërtuar mirëqenien tonë. Për ironi, sot po rivarrosim vetëm gjysmën e familjarëve tanë’, ka thënë Gramozi.
Më 26 mars të vitit 1999, forcat serbe shkaktuan ndaj familjes Berisha njërën nga padrejtësitë më të madhe kundër njerëzimit. Në këtë masakër u vranë 48 burra, gra fëmijë e pleq. 15 vjet pas, vetëm trupat e 24 anëtarëve të kësaj familje janë gjetur. Trupat e të tjerëve ende mungojnë.
Gramoz Berisha ka folur me tone pozitive për të ardhmen. Ai ka thënë se kohëzgjatja nuk do t`i ligështojë, sepse ai dhe familjarët e tjerë do të qëndrojnë për ta zbardhur të vërtetën, të vërtetën, që sipas Gramozit, po i frikësohen shkaktarët e tragjedisë.
“Ky është fati ynë. Drejtësia vonon por ajo do të vijë. Nuk do të jetë përgjysmë por do të jetë e plotë. Ne nuk duhet të ligështohemi nga pritja që ndoshta është pak më e gjatë. Ne jemi mjaftueshëm të fuqishëm të përballemi me këtë fat. Ata që e shkaktuan padrejtësinë duhet t’i frikësohen të ardhmes. Ne duhet t`i gëzohemi të ardhmes”, ka thënë Gramozi. /Tribuna/