Partia Demokratike e Kosovës(PDK) në Prizren, nuk i frikësohet ndryshimeve të fundit të Degës së LDK-së në këtë qytet.
Zëdhënësi i PDK-së, Samir Hoxha thotë se PDK-ja ka dëshmuar se e ka mbështetjen e qytetarëve të Prizrenit. Ai, madje ndryshimet e fundit të Degës së LDK-së në Prizren, i quan “tundime”.
“PDK-ja në Prizren, nuk i frikësohet as pak tundimeve të fundit në LDK-në e Prizrenit”, tha Hoxha për “PrizrenPress”.
Kryetari i ri i LDK-së në Prizren, Haxhi Avdyli, pas marrjes së besimit, ka premtuar se do të punojë që LDK-ja të rimarrë sërish pushtetin. Ai ka kritikuar mënyrën se si ka qeverisur deri më tash PDK-ja me Prizrenin.
Zëdhënësi i PDK-së në Prizren, Samir Hoxha thotë ndërkaq se kryetari Ramadan Muja ka dëshmuar se deri më tash ka përmbushur detyrat dhe besimin që ka marrë nga qytetarët.
“Ne kemi qenë dhe vazhdojmë të jemi të bindur se kryatri Muja dhe Ekzekutivi, janë duke përmbushur detyrat dhe përgjegjësit konform platformës politike dhe programit qeverisës. Kjo është dëshmuar edhe në zgjedhjet e fundit ku kryetari Muja fitoi mandatin e tretë”. /PrizrenPress.com/