Gjykata Kushtetuese ka konstatuar se duhet të themelohet Asociacioni i Komunave me shumicë Serbe, ndonëse nuk i ishte drejtuar një pyetje e tillë nga presidentja Atifete Jahjaga.
Kështu ka deklaruar gjatë një interviste për gazetën “Zëri” Hydajet Hyseni, kryesues i Këshillit të Përgjithshëm në Lëvizjen “Vetëvendosje”, duke shtuar se pyetja për Gjykatën ishte nëse marrëveshja për “Zajednicën” ka qenë në pajtim me Kushtetutën e Republikës së Kosovës, për të cilën ka konstatuar se nuk është në pajtim me pjesën më të madhe të aktit më të lartë juridik të vendit.
Sipas tij, marrëveshja për “Zajednicën” e shpie Kosovën drejt Republikës serbe të Bosnjës, pasi që, siç ka thënë ai, kjo mbron vetëm interesat e serbëve të Kosovës, por jo edhe të qytetarëve të kombësive tjera dhe bie ndesh me Kushtetutën e vendit.