0.8 C
Prizren
E shtunë, 4 Shkurt, 2023

Ish-këshilltarja e Komunës së Prizrenit dënohet me 200 euro gjobë për mosraportim të pasurisë

 Samra Ilijazi, ish-këshilltare e Kuvendit Komunal në Prizren, tani deputete e Kuvendit të Republikës së Kosovës, është dënuar me 200 euro dënim me gjobë, pasi pranoi fajësinë për mosraportim të pasurisë.

Ilijazi ngarkohej se nuk kishte bërë deklarimin e pasurisë kur ishte në cilësinë e këshilltares Komunale në Prizren.

Aktgjykimi ndaj saj është shqiptuar të martën, nga gjykatësi Gani Kastrati, pasi e akuzuara Ilijazi, e pranoi fajësinë për veprën penale që i vihet në barrë.

Sipas aktgjykimit të shpallur nga Gjykata Themelore në Prizren, e akuzuara Samra Ilijazi, po ashtu, është obliguar që të paguajë edhe paushallin gjyqësor prej 20 euro, si dhe 30 euro për kompensimin e viktimave.

E akuzuara Ilijazi, dënimin me gjobë prej 200 euro është e obliguar që ta paguajë në afat prej 15 ditësh pas plotfuqishmërisë së aktgjykimit dhe se nëse dënimi me gjobë nuk mund të paguhet, i njëjti mund të zëvendësohet me dënim me burgim, ashtu që për një ditë burgim do të llogaritet 20 euro.

Ndryshe, Prokuroria Themelore në Prizren, Departamenti i Përgjithshëm, më 24 nëntor 2021 ka ngritur aktakuzë kundër Samra Ilijazit – zyrtare e lartë, për shkak të dyshimit të bazuar mirë se ka kryer veprën penale “Mosraportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare”.

Sipas aktakuzës, nga 1 mars 2021 deri më 31 mars 2021, e akuzuara Samra Ilijazi në cilësi të zyrtarit të lartë publik, këshilltare e Asamblesë Komunale në Prizren, duke qenë e detyruar të bëjë deklarimin e rregullt vjetor të pasurisë, edhe përkundër faktit që paraprakisht ishte njoftuar përmes e-mailit zyrtar më 3 mars 2021, e njëjta nuk ka bërë deklarimin e rregullt të pasurisë brenda afatit të paraparë ligjor dhe mosdeklarimin e pasurisë nuk ka mundur që ta arsyetojë.

Me këto veprime, e pandehura Samra Ilijazi, ngarkohej se ka kryer veprën penale “Mosraportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare” nga neni 430, paragrafi 1 të Kodit Penal të Republikës së Kosovës (KPRK).

Ndryshe, vepra penale “Mosraportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare”, është vepër e cila hyn në kuadër të kapitullit “Korrupsioni zyrtar dhe veprat penale kundër detyrës zyrtare” të Kodit Penal të Republikës së Kosovës. /BetimipërDrejtësi

Më Shumë

97 vjet nga lindja e kompozitorit dhe muzikantit Tish Daija

Më 30 janar 1926 ka lindur kompozitori dhe muzikanti shqiptar Tish Daija. Lindi në Shkodër nga një familje artizanësh. Ende pa hyrë në shkollë bëhet...

Januzaj në Istanbul Basaksehir

Adnan Januzaj edhe zyrtarisht ka nënshkruar me Istanbul Basaksehirin. Januzaj do të jetë pjesë e Istanbul Basaksehirit në formë huazimi deri në fund të edicionit...

Lajmet e Fundit