Të premten ambasadorja e ShBA-ve në Kosovë, Tracey Ann Jacobson, së bashku me David Grreer-in, drejtorin e Programit për Përmbarim dhe Legjislacion Komercial nga USAID-i dhe Xhim Hop-in, drejtor i misionit, vizituan Gjykatën Themelore të Prizrenit.
Ambasadorja dhe përfaqësuesit e USAID-it në takim me kryetarin e kësaj gjykate, Ymer Hoxha, diskutuan për gjetjen e mënyrave që lëndët në gjykata të mos grumbullohen.
Zëdhënësja e Gjykatës Themelore të Prizrenit Afërdita Kicaj tregoi tri komponentët për të cilët u bisedua.
“1.Përmbarimi i aktgjykimeve- eliminimi i lëndëve përmbaruese në gjykata, 2. Legjislacioni komercial (Ndërmjetësimi, regjimi dhe Ligji i ri për Falimentim) dhe 3. Edukimi i publikut dhe komunikimi me publikun-praktikat transaksionale biznesore, trajnimi juridik dhe për avokim në temat e legjislacionit komercial”, shpjegoi Kicaj.
Kryetari i Gjykatës Themelore të Prizrenit, Ymer Hoxha, vizitën e ambasadores Jacobson e vlerësoi si përkrahje dhe mbështetje për punë të mëtejshme në drejtësi.
Ai tha se është hera e dytë që ambasadorja e ShBA-së e viziton gjykatën e Prizrenit. Kryetari ndër të tjera foli për rezultatet dhe për sfidat e kësaj gjykate.
Po ashtu kryetari Hoxha, e falënderoi ambasadoren dhe bashkëpunëtorët e saj për investimet që bën USAID-i në të gjitha segmentet e jetës në shoqëri e në veçanti për gjyqësorin.
“Jemi të përkushtuar në luftimin e të gjitha formave të krimit në atë mënyrë që të krijojmë një ambient të qetë për qytetarët, të joshim investitorët e huaj që të investojnë në vendin tonë sepse vetëm në këtë mënyrë mund ta përgatisim shtetin tonë për t’u inkuadruar në Bashkësinë Evropiane”, tha Hoxha.
Ndërsa, ambasadorja e përkrahu punën e mirë të Gjykatës Themelore të Prizrenit dhe premtoi që edhe në të ardhmen Qeveria e saj do ta mbështesë Kosovën. /kallxo.com/