Kandidatët për deputet të VV-së nga Prizreni,Nora Arapi-Krasniqi,Mytaher Haskuka,Artan Abrashi,Valizake Thaçi-Celina dhe Levent Kasëmi, kanë premtuar se nëse marrin besimin e qytetarëve do të jenë zëri i tyre në Parlamentin e Kosovës.
Ata premtuan do të angazhohen në ruajtjen dhe promovimin e trashëgimisë kulturore të gjithë Kosovës, por në veçanti atë të Prizrenit.
“Trashëgimia kulturore e Kosovës paraqet një pasuri të jashtëzakoshme që përfaqëson identitetin kulturor të popujve që kanë jetuar dhe vepruar në këtë territor. Kjo trashëgimi është e shprehur në forma të prekshme dhe të paprekshme. Ruajtja dhe promovimi i trashëgimisë kulturore është një përgjegjësi tepër e rëndësishme e gjithë shoqërisë, e në veçanti e institucioneve shtetërore, ndaj brezit të sotëm dhe brezave të ardhshëm”.
“Trashëgimia kulturore, ajo arkitektonike dhe shpirtërore e Prizrenit, paraqesin thesarin bazë të këtij qyteti, që njihet edhe si qyteti kulturor i Kosovës”
Ne kandidatët e poshtëshënuar të Lëvizjes VETËVENDOSJE! për deputetë në Kuvendin e Republikës së Kosovës, në rast të marrjes së detyrës për përfaqësimin e vullnetit qytetar në institucionin më të lartë vendimmarrës, zotohemi publikisht se do të jemi zë që mbron dhe përfaqëson vullnetin politik të të gjithë qytetarëve pa dallim”.
“Me theks të veçantë do të angazhohemi për ruajtjen dhe promovimin e trashëgimisë kulturore të gjithë Kosovës, dhe në veçanti të Prizrenit”.
“Ne do të përkushtohemi për ndërtimin e një sistemi të monitorimit të përhershëm parlamentar që do të përcillte punën e ekzekutivit në fushën e menaxhimit dhe zhvillimit urban në qytetin e Prizrenit, me theks të veçantë në ruajtjen e trashëgimisë kulturore”.
“Krahas ruajtjes së vlerave të trashëgimisë kulturore, do të angazhohemi për krijimin e një mjedisi të përshtatshëm për zhvillim të kontrolluar dhe të qëndrueshëm urban, duke siguruar gjithnjë ruajtjen e vlerave urbane tradicionale të Prizrenit”/PrizrenPress.com/