Ministri i Punëve të Jashtme, Enver Hoxhaj muaj me parë kishte premtuar se Kosova brenda ditësh do të njihej nga se paku dy shtete. Por ky premtim i tij mbetur vetëm fjalë. Megjithatë zyrtarë në Ministrinë e Jashtme insistojnë se dy shtete tashmë e kanë njohur Kosovën. Ndërsa zyrtarizimi i tyre do të bëhet sapo të përfundojnë disa procedura të brendshme vendimmarrëse.
“Dy vende tashmë e kanë marrë vendimin dhe do të bëhet publik shumë shpejt, sapo të përfundojnë procedurat e brendshme vendimmarrëse”, ka thënë për gazetën Tribuna një zyrtar brenda MPJ-së, pa dashur t’i përmendej emri. Kosova brenda këtij viti ka arritur t’i bindë vetëm katër shtete që ta njohin pavarësinë e saj, të shpallur gjashtë vite me parë. Tonga, Lesoto, Togo dhe Ishujt Sollomon janë shtetet që këtë vit e kanë pranuar Kosovën si shtet.
Këto njohje e kanë quar në 108 numrin e shteteve që e kanë njohur pavarësinë e vendit tonë. Njohës të çështjeve politike, vlerësojnë se ngërçi politik në vend ka ndikuar në stagnimin e njohjeve. Sipas tyre, nëse ngërçi vazhdon, atëherë Kosova rrezikon edhe rrugën e saj drejt integrimeve evropiane./tribuna/