Komuna e Suharekës u dha punëtorëve të saj edhe të premten ditë pushimi, pasi shumica e stafit komunal kishte shkuar në Shqipëri për festën e 1 majit-Ditës Ndërkombëtare të Punëtorëve. Qytetarët të premten nuk mundën të kryejnë punët e tyre, teksa komuna u mjaftua ta shkruajë një njoftim që tregonte për shkuarjen e punëtorëve në shtetin shqiptar.
Punëtorët e Komunës së Suharekës i dhanë vetes pushim edhe të premten, për ta lidhur pushimin zyrtar të 1 majit me vikendin, në mënyrë që të shkojnë në Shqipëri.
Në fund të njoftimit të publikuar për pushimin e festës së 1 majit, thuhej se “për punëtorët të cilët nuk udhëtojnë për Shqipëri, dita e premte është ditë pune”, ndërsa në Drejtorinë e Kadastrit kishte dalë në punë vetëm njëri nga punonjësit.
Komunarët e Suharekës kanë udhëtuar drejt Pogradecit, duke lënë pa kryer punë të premten qytetarë të ardhur edhe nga më larg.
“Kam ardhur me nxjerrë certifikatën e lindjes prej Ferizajit, nuk po punojnë kurrkush. Thanë janë shku në Shqipni”, thotë i moshuari Sylejman Lubovci, pasi Zyra e Gjendjes Civile ishte e mbyllur.
Edhe Nuhi Bytyqi u ankua për moskryerje të punës.
“Kesh me nxjerr certifikatën teme edhe të kunorizimit të babës edhe të nënës….nuk e nxjerra se ishin mbyllë. Thanë që kanë shku në Shqipëri, edhe pse koha e punës është. Me ardh e m’u kthy prapë nuk është mirë”, tha Bytyqi për Gazetën Jeta në Kosovë.
Gazeta tentoi ta kontaktojë zëdhënësin e Komunës së Suharekës Reshat Reshitajn, por ai telefonin e kishte të mbyllur, pasi si shumica e kolegëve të tij po çlodhej në Pogradec./Gazeta Jeta në Kosovë/