Ndonëse zgjedhjet lokale do të mbahet pas tre muajsh, Suhareka tashti duket si të ishte në vrullin e fushatës zgjedhore. Pankartat e vendosura nga partia në pushtet AAK-ja, në sheshin kryesor të qytetit, e në të cilat pasqyrohen premtimet e realizuara të kreut të saj, të japin përshtypjen se zgjedhjet janë vetëm disa ditë larg. Siç raporton KTV-ja, në këto pankarta, që kanë logon e AAK-së, janë të vëna premtimet dhe projektet e realizuara.
Partia rivale e AAK-së, LDK-ja, e cila së fundmi ka bërë publik emrin e kandidatit të saj për zgjedhjet e 3 nëntorit, e akuzon partinë në pushtet se po keqpërdor pushtetin në funksion të fushatës zgjedhore.
Sipas kandidatit të kësaj partie, Sali Asllanaj, pllakatet e vendosura me logo të AAK-së janë bërë me mjete të qytetarëve, gjë që paraqet keqpërdorimin të taksave të qytetarëve.
Por, kreu aktual i Suharekës, Blerim Kuçi nuk e konsideron këtë aspak si fushatë zgjedhore. Këto pankarta të vëna në qendër të qytetit, sipas Kuçit, janë formë e pasqyrimit të punës që ka kryer ai deri tashti. Madje, Kuçi nuk e mohon se këto pankarta janë vendosur me fonde të Komunës, me gjithë faktin se përmbajnë logon e partisë së tij.
Qytetarët suharekas, ndërkaq, vendosjen e këtyre pankartave e vlerësojnë në mënyra të ndryshme. Megjithatë, ka edhe të tillë që thonë se kjo fushatë e bërë është jo legjitime. Zgjedhjet lokale pritet të mbahen më 3 nëntor, ndërsa fushata për to pritet të zgjasë nga 3 tetori e deri më 2 nëntor. Por kjo mund të ndryshohet në shtator, kur pritet të dërgohet në Kuvend Projektligji për reformën zgjedhore, i cili parasheh 15 ditë fushatë parazgjedhore.