Lidhja Demokratike e Kosovës (LDK) në Prizren e quan shantazh ftesën e fundit të Komunës drejtuar tatimpaguesve që t’i fshijnë borxhet me këste, “ndryshe do të iniciojmë procedurën të përmbaruesi”.
“Kryetari Mytaher Haskuka i paska kërcënuar edhe qytetarët që këtë vit të vështirë pandemie, nuk kanë arritur që me kohë të përmbushin obligimin e tatimit pë pronat që posedojnë”, thuhet në reagimin e LDK-së në Prizren.
“Qytetarët e Prizrenit janë të njohur për bashkëpunues të mirë dhe përmbushje të obligimeve tatimore, ata nuk meritojnë shantazhe e presione të tilla”.
“Një thirrje miqësore e kryetarit do të kryente punë mjaftueshëm, dhe jo formën që ky zgjedh gjithmonë, kërcënimin me procedura përmbaruese”.
Sipas LDK-së, qeverisja e Haskukës secilën ditë po tregon se ka dështuar në realizimin e premtimeve .
“Qeveria komunale në Prizren, përgjatë gjithë mandatit katërvjeçar, nuk ka ditur e as që ka bërë pëpjekje të mësoi se si të realizoi projekte që do të përmirësonin kualitetin e jetës tuaj të përditshme”.
“Si rezultat i mungesës së ideve, kreativitetit dhe vullnetit për të punuar, Komunës së Prizrenit edhe këtë vit i kanë shkuar në suficit 8 milionë e 688 mijë e 134 euro nga buxheti final që ka pasur prej 53,654,638.00 euro”.
“Sipas raportit të auditorit, komuna ka shpenzuar vetëm 44,966,503.53 milionë euro apo 84% të buxhetit”.
“Në raport po ashtu nënvizohet fakti se kjo komunë ka shpenzuar buxhetin vetëm 5% më mirë se në vitin paraprak, që i bie se këtë vit zgjedhor po bëjnë përpjekje të bëjnë diçka sipërfaqësore për efekte elektorale, por pa sukses”.
“As gropat nëpër rrugë nuk ja dolën ti mbyllin, me gjithë kaosin e krijuar në pikën e verës e ardhjes së bashkëatdhetarëve”.