Zyra e Informimit e Lidhjes Demokatike të Kosovës (LDK), shpreh shqetësimin për politikat e informimit që po ndjek Televizoni Publik i Kosovës.
LDK-ja konsideron se Televizioni Publik duhet të ketë qasje të njëjtë për të gjithë dhe për të gjitha ngjarjet në vend.
”Shkarkimi i producentit ekzekutiv, njëherit përgjegjës kryesor i Redaksisë së Aktualiteteve, z. Behxhet Begu, dhe i moderatorit të emisionit qendror politik “Debat”, z. Ridvan Berisha, është mesazh shumë i keq.
Në një transmetues publik të gjithë kanë të drejtë të përfaqësohen, sepse transmetuesi i tillë ekziston dhe funksionon nga taksat e qytetarëve.
Është tepër e qartë se z. Begu dhe z. Berisha janë larguar për shkak të edicionit të së martës të emisionit “Debat”, në të cilin z. Fatmir Limaj njoftoi largimin e tij nga PDK-ja dhe formimin e një subjekti tjetër politik.
Këtë lajm nuk mund dhe nuk ka si ta fsheh RTK-ja duke i larguar producentin dhe moderatorin e emisionit.
LDK-ja u bën thirrje drejtuesve të Transmetuesit Publik që të sillen në përputhje me ligjet.
RTK-ja duhet të jetë transmetues i taksapaguesve dhe jo i pjesës që ka mbetur nga PDK-ja”, thuhet në njoftim. /PrizrenPress.com/