Buxheti i Republikës së Kosovës do të jetë këtë të enjte para ligjvënësve, bashkë me ndryshimin që ka bërë Qeveria ku si amendament ka futur edhe privatizimin e PTK-së. LDK-ja dhe Vetëvendosja kanë deklaruar sërish se do ta bojkotojnë seancën kur t’i vij koha votimit të buxhetit të licat e quajnë si kundër-kushtetues me ndërhyrjen që ka bërë qeveria.
Shefi i Grupit Parlamentar të LDK-së, Ismet Beqiri tha se nëse leximi i dytë i buxhetit shqyrtohet bashkë me amendamentin 8, që ka të bëjë me shitjen e 75% të aksioneve të PTK-së atëherë ata nuk do të qëndrojmë në sallë, transmeton KTV. Ai sërish ka thënë se nëse buxheti si i tillë arrin të marr votat e deputetëve, LDK-ja do ta dërgojë në Gjykatë Kushtetuese.
Edhe Vetëvendosje thotë se do të ndërmarr të gjitha masat brenda seancës për të penguar votimin e këtij buxheti bashkë me amendamentin për privatizimin e PTK-së.
Ndërkohë shefi i Grupit Parlamentar të PDK-së Adem Grabovci ka thënë se dokumenti i buxhetit përmban amendamentin e shitjes së PTK-së, por ka kërkuar nga deputetët arsyeshmëri që buxheti të kalojë. Ai ka thënë se PDK-ja nuk do të angazhohet për t’i bindur deputetët të votojnë pro këtij buxheti, por pret që ata të vlerësojnë vetë meqë, siç tha ai, buxheti nuk është as i PDK-së as i LDK-së por i qytetarëve të Kosovës.