Futbollisti me prejardhje nga Kosova, Ermir Lenjani rikthehet në Zvicër, por këtë herë në Challenge League, ose kategorinë e dytë të futbollit helvet.
34-vjeçari ka ndërprerë para kohe kontratën me Umranyespor dhe ka firmosur me FC Schaffhausen, skuadër ku shërben si drejtor sportiv ish-sulmuesi shqiptar i Zvicrës, Admir Mehmedi. Lenjani është rritur te Winterthur në Zvicër, para se të spikaste te St. Gallen.
Në 2015-ën ai u transferua ne Francë te Rennes, dhe një vit më vonë te Nantes, para se të rikthehej në Zvicër për të veshur fanellat e klubeve si Sion dhe Grasshopers.
Lenjani numëron 45 ndeshje me fanellën kuqezi të Kombëtares Shqiptare dhe 6 gola të shënuar, teksa ka qenë pjesë e skuadrës që përfaqësoi vendin në Evropianin e Francës.