Ankesat e banorëve të rrugës ”Lkeni i Hasit” janë të vjetra tash e disa vjet. Xhevat Morina, banor i kësaj lagjeje, shprehet për gazetën se tani e sa vite përballen me një hall të madh për asfaltimin e rrugës së tyre, pasi është e vetmja rrugë në këtë lagje që ka mbetur e paasfaltuar.
“Prandaj, kjo edhe po ua vështirë- son qarkullimin, duke e bërë jetën të padurueshme për këta banorë, e veçanërisht për nxënësit që shkojnë në shkollë”. Pas të reshurave, banorët thonë se qarkullimi vështirësohet edhe më shumë, por edhe gjatë stinës së dimrit, banorët shprehen se disa herë kanë bërë kërkesë në organet komunale që edhe kjo rrugë të rregullohet”, thotë Morina.
Xhevat Morina shprehet se që 10 vjet janë në këtë lagje dhe kanë vështirësi të shumta, sidomos gjatë dimrit dhe kur ka të reshura. “Në këtë rrugë mezi kalohet me vetura, e më keq po e kanë nxënësit që po shkojnë në shkollë. Ata të befasuar pyesin se si vetëm kjo rrugë, për dallim nga rrugët e tjera të lagjes, ka mbetur në këtë gjendje të mjeruar”. Kjo rrugë është e parregulluar që nga pas lufta, tregon një banor tjetër i kësaj lagje. Haxhi Berisha shprehet se të gjithë banorët sa janë në këtë lagje, rreth 12 shtëpi, kanë probleme me këtë rrugë. “Kemi qenë në Komunë për të kërkuar që të na e rregullojnë rrugën, por deri më tani nuk kanë bërë asnjë veprim. Premtime ka kur ndodhin fushatat zgjedhore. Atëherë kemi një mal premtimesh se do ta rregullojmë këtë rrugë, hidhet edhe ndonjë lopatë zhavorri vetëm sa për të kaluar ato premtime. Por ne jemi këmbëngulës që të rregullohet kjo rrugë”, thotë Berisha.
Këta banorë të kësaj lagjeje shpresojnë që këtë vit Drejtoria e Shërbimeve Publike do të gjejë mundësitë për rregullimin e kësaj rruge dhe t’ua lehtësojë qarkullimin e lirshëm banorëve. Së paku që kjo rrugë të mos bëhet liqen kur bie shi e borë. Kurse drejtori i Shërbimeve Publike, Levent Kasëmi, për “Kosova Sot”, theksoi se ka një vijë buxhetore për lagjen” Arbana”, duke thënë se e di që ka nevoja shumë, por ka edhe shtëpi ndërtimi edhe pa leje. Ai beson se këtë vit do të ndihmojnë për asfaltim të kësaj rruge. Megjithatë, banorët e kësaj lagjeje shpresojnë se këtë vit do të gjendet mundësia që të rregullohet infrastruktura e kësaj rruge. Ata thotë se nuk do të ndalen së kërkuari që të meremetohet kjo rrugë.
(Kosova Sot)