Ndonëse ishte paraparë që të performonte para adhuruesve të saj në Bruksel më 27 mars, këngëtarja e njohur e muzikës pop, Mariah Carey, anuloi koncertin e saj në kryeqytetin belg, si pasojë e sulmeve të fundit terroriste që ndodhën atje e që lanë dhjetëra të vdekur e qindra të plagosur.
“I dua jashtëzakonisht fansat e mi në Bruksel, por në këtë moment jam këshilluar ta anuloj koncertin pikërisht për sigurinë e tyre, të grupit tim shoqërues, të stafit dhe të të gjithëve”, shkroi Carey në llogarinë e saj në Twitter.
Rikujtojmë se njëlloj si Carey vepruan edhe shumë artistë të famshëm pas sulmeve që ndodhën vitin e kaluar në Paris. Ata për disa javë me radhë për shkaqe sigurie anuluan të gjitha koncertet e tyre kudo në Evropë.