Kandidati i NISMA’s për Kosovën, Milaim Zeka, ka thënë se kandidatët e NISMA’s për Kosovën do të marrin vota sa në Malishevë aq edhe në Drenicë. Ka thënë se këto dy qytete janë një derisa ka rikujtuar kohën kur Adem Jashari e Fehmi Lladrovci sa herë kanë shkuar për Shqipëri janë ndalur në vendlindjen e Fatmir Limajt.
“Jakup Krasniqi kur ka qenë Jugosllavia superfuqi na ka thënë hajdi pas meje dalim fitimtar. Këta deputetë që i shihni sot në Malishevë kanë me pas vota edhe në Drenicë. Sepse Malisheva ka qenë krenaria e Kosovës. Malisheva ka qenë Drenicë e Drenica Malishevë. Adem Jashari gjithmonë sa herë ka shkuar në Shqipëri është ndalë në Malishevë”, ka thënë Zeka, në tubimin e NISMA’s, në Malishevë.
Ai ka thënë se votuesit do t’i dënojnë ata që e kanë diskriminuar Malishevën.
“Ata që kanë ndjell racizëm ndaj Malishevës do ta marrin dënimin e merituar”, ka shtuar ai.
Kandidati për deputet i NISMA’s ka folur edhe për akuzat e LDK’së se koalicioni i NISMA’s me PDK’në është i territit.
Zeka ka thënë se këtë konstatim po e bëjnë ata që e kanë lënë Kosovën në terr.
“Koalicioni tjetër po flet për terr sepse në terr e kanë lënë Kosovën”, ka thënë Zeka.