Ministri i Arsimit, Shyqiri Bytyqi, duke iu referuar SBASHK-ut ka thënë se në asnjë mënyrë nuk do të lejohet krijimi i institucioneve paralele pasi që në këtë mënyrë vendi do të futej në një rrugë pa krye.
Ai këto komente i ka bërë në emisionin Info Magazine në Klan Kosova, duke shtuar se nuk i takon sindikatës të arsimit që të bëjë thirrje për moskompensim të orëve të humbura gjatë grevës.
“Kur i marrim në konsideratë orët që i kemi të përcaktuara me ligj, vërejmë se orët e zhvilluara deri më tani janë nën normën e dëshiruar”.
“Sindikata ka filluar të marrë kompetenca që nuk i takojnë. Në këtë situatë, kanë filluar mësimdhënësit të bëjmë pyetje se cili është roli i sindikatës. Nëse ne lejojmë që të kemi institucione paralele, atëherë do të futemi në një rrugë pakrye”.
“Nëse SBASHK-u bën thirrje që të mos kompensohen orët e humbura atëherë nuk e di se si të quhet tjetër përveçse një ‘institucion paralel i MASHT-it’. Sindikata nuk është organ që merr vendime”.
“Ne kemi kërkuar nga të gjitha palët që ta plotësojnë normën e orëve të humbura gjatë grevës. Jam shumë optimist se kjo gjë do të arrihet dhe i bëj thirrje sindikatës që mos ta pengojë këtë gjë”.
“Arritja e normës së orëve të mësimit është obligim ligjor dhe nuk është çështje dëshirash. Nëse sindikata mendon se ne nuk kemi të drejtë atëherë këtë gjë do ta thotë vendimi i gjykatës”.