Ani pse deri më tani nuk ia ka dalë të hartojë një strategji a projekt konkret për promovimin e turizmit kulturor, Ministria e Kulturës sivjet e ka “liruar” veten krejtësisht nga ky sektor.
Në buxhetin për vitin 2015 nuk është paraparë asnjë cent për turizmin kulturor.
Njëjtë MKRS-ja kishte vepruar edhe vitin e kaluar.
Në vitet e mëparshme, për këtë sektor institucioni më i lartë kulturor në vend, kishte ndarë nga 100 mijë euro.
Por në shumicën e rasteve ato ishin orientuar në projekte të tjera.
Në janar të vitit 2013, MKRS-ja kishte njoftuar se ka shfrytëzuar 55 mijë euro të ndara për promovimin e turizmit kulturor më 2012 për t’i shpenzuar që Parkun Arkeologjik të Prishtinës ta shndërrojë në Qendër të Turizmit Kulturor.
Ky projekt, prej asaj dite e sot ende nuk është finalizuar.
Ekspertë të fushës së turizmit e trashëgimisë kulturore kritikojnë MKRS-në që tash e më shumë se një dekadë nuk e ka hartuar një strategji për promovimin e turizmit kulturor.
Nga ana tjetër, Ministria e Kulturës, e Rinisë dhe e Sportit, edhe pse e ka përjashtuar këtë sektor nga buxheti i këtij viti, paralajmëron se mbështetja institucionale për këtë sektor është duke u përcaktuar në dokumentin e Strategjisë Nacionale për Trashëgimi Kulturore, dokument i cili ende nuk është përpiluar./Koha Ditore/