Senatori amerikan Christopher Murphy ka thënë se pesë vjet më parë nuk do ta kishin imagjinuar dot se do të ishin sot këtu, në një proces drejt normalizimit të marrëdhënieve mes Serbisë dhe Kosovës.
Ai ka thënë se duhet ende përparim në vendosjen e dialogut.
“Ka entuziazëm në të dy kryeqytetet për të bërë përpara me këto marrëveshje dhe për t’i diskutuar marrëveshjet e ardhshme”, është shprehur Murphy në një intervistë për Zërin e Amerikës.
Ai ka bërë me dije se e ka vizituar Kosovën për t’ua bërë të qartë liderëve aktualë se duhet të bashkohen për të krijuar një qeveri sa më shpejt të jetë e mundur, siç ka thënë ai, për t’iu paraqitur të bashkuar botës dhe për ta treguar aftësinë e tyre për t’i zbatuar elementët e rëndësishëm të marrëveshjes së Brukselit.
“Shkova në Kosovë për ta bërë të qartë se e gjithë udhëheqja duhet të bashkohet për të krijuar një qeveri sa më shpejt të jetë e mundur, për t’iu paraqitur të bashkuar botës dhe të jenë të aftë për t’i zbatuar elementët e rëndësishëm të marrëveshjes së Brukselit. Mungesa e Qeverisë në Kosovë nuk është një arsye që Beogradi të rrijë duarkryq. Ka disa hapa që mund të ndërmerren nga Beogradi për t’i zbatuar disa pjesë të asaj marrëveshje. Por, detaji më i rëndësishëm për t’i vazhduar më tej marrëdhëniet e normalizuara mes Kosovës dhe Serbisë është që partitë politike në Kosovë t’i lënë mënjanë paragjykimet e tyre politike dhe të ndërtojnë së bashku një qeveri të re”, ka thënë Murphy.