Disa nga deputetët e PDK-së, të cilët javë më parë nuk e mbështetën aprovimin e amendamenteve kushtetuese për Gjykatën Speciale, pritet të ndryshojnë qëndrim.
Njëri nga nënkryetarët e PDK-së i ka thënë gazetës “Zëri” se deputetët e partisë së tij në të ardhmen do ta mbështesin krijimin e Dhomave Speciale dhe do të sigurohen votat e nevojshme për aprovimin e saj.
“Besoj se gjatë ditëve të ardhshme shefi i Partisë, Hashim Thaçi, do t’i konsultojë deputetët veç e veç, por edhe do të mbahet mbledhja e grupit dhe aty do të qartësohen gjërat. Nuk guxojmë të lejojmë edhe njëherë dështimin e Gjykatës Speciale. Kjo do t’iu bëhet e qartë deputetëve dhe prandaj pritet reflektim i gjithë deputetëve”, ka thënë njëri nga nënkryetarët e PDK-së.
Sipas tij, lideri i partisë, Hashim Thaçi, kësaj radhe pritet të jetë më i rreptë në raport me deputetët që nuk e kanë votuar Specialen. /Zëri/