Qytetarët aktiv për Prizrenin nesër sërish do të protestojnë kundër kryetarit të Komunës së Prizrenit Ramdan Muja. Ky vendim i qytetarëve aktiv për Prizrenin ka ardhur pas dështimit të sotëm të mbajtjes së seancës së jashtëzakonshme të Kuvendit Komunal, mbledhje kjo e thirrur nga partitë opozitare, në të cilën kërkohej dorëheqja e Ramdan Mujës.
Njëri nga organizatorët e protestës, Kastriot Jahaj e ka konfirmuar për Gazetën Blic mbajtjen e këtryre protestave paqësore. Ai ka thënë se janë të vendosur që të mos lëshojnë pe deri në dorëheqjen e Ramdan Mujës.
“Ndodhitë e sotme në Kuvendin Komunal të Prizrenit flasin qartë për papërgjegjësinë totale të këtij pushteti që nuk zgjedh mjete për të qëndruar në pushtet, madje duke shkelur ligjin vazhdimisht. Qytetarët aktiv për Prizrenin do të vazhdojnë protestën me bllokim paqësor të premten dhe ditëve të tjera të punës, deri në dorëheqje”, ka thënë Jahaj.