Në ceremoninë hapëse të Festivalit “Nine Eleven Dedication Film Festival”, e cila është mbajtur të premten në “Sheshin 21”, kanë marrë pjesë komuniteti artistik, delegacione të ndryshme nga organizatat kombëtare dhe ato ndërkombëtare, ambasada, parti politike, mediume etj.
Ky edicion ka ardhur me tetë premiera nga “Prishtina Film” dhe me njëmbëdhjetë filma nga produksionet e tjera, të cilët hyjnë në konkurrencë për këto çmime: Filmi më i Mirë, Kamera më e Mirë, Montazhi më i Mirë, Regjia më e Mirë, Skenari më i Mirë, Roli më i Mirë i Femrës, Roli më i Mirë i Mashkullit dhe Muzika më e Mirë.
Përpos tetë premierave, në këtë edicion do të ketë edhe një surprizë tjetër në hapje. Gjithashtu, tashmë është bërë praktikë e festivalit që juria të zbulohet natën e hapjes. Nga data 8 deri më 10 shtator do të bëhet projeksioni i filmave nga ora 20:00 dhe është falas për audiencën.