Partia e Drejtësisë, sqaroi se shkrimet nëpër portale të ndryshme, se kinse Partia e Drejtësisë është ndarë, nuk janë të vërteta dhe si të tilla janë të paqëndrueshme. PD konsideron se Amir Ahmeti nga PD-ja është larguar tash e dy vjet, ndërsa i ka uruar atij punë të mbarë në partinë e re.
PD nuk e sheh problem largimin e Amir Ahmetit e as themelimin e partisë së re nga ai.
“Argument tjetër se Partia e Drejtësisë nuk është ndarë dhe është më e fuqishme se kurrë tregon fakti, se edhe pas largimit të z. Ahmetit, PD-ja në Zgjedhejt Lokale që sapo përfunduan ka arritur të shënoi rritje për 30%, krahasuar me zgjedhjet e vitit 2009”, thuhet në komunikatën e PD-së.
PD thekson se individët që largohen nga PD-ja nuk mund ta dëmtojnë imazhin e partisë, pasi që konsideron se në gjirin e sja ka shtresa të ndryshme intelektuale dhe se presin që edhe në zgjedhjet nacionale të tregohen të suksesshëm.
“Po ashtu PD-ja ka arritur që këto zgjedhje të përfaqësohet me 23 asamblistë komunalë në nivel vendi dhe në disa komuna edhe të udhëheq drejtori të caktuara. Partia e Drejtësisë nuk përbëhet nga individ të caktuar, por është një parti që në gjirin e saj ka shtresa të ndryshme intelektuale të cilat janë të përkushtuara që edhe në zgjedhjet nacionale që pritet të mbahet vitin e ardhshëm të arrijë rritje dhe përfaqësim më të fuqishëm në institucionet e vendit. Largimet individuale, nuk mund të dëmtojnë një parti e cila është themeluar 15 vjet më parë dhe është e shtrirë në 24 komuna të Kosovës”, përfundon reagimi i PD-së. /PrizrenPress.com/