Partia Demokratike e Kosovës, dega Prizren, ka reaguar në lidhje me punimet që po zhvillohen në rrugën e Farkëtarëve.
Përmes një komunikate për medie, PDK ka akuzuar kreun e Komunës, ku sipas tyre po dëmtohet vlera e qytetit.
Komunikata e plotë:
Në Qendrën Historike të Prizrenit, respektivisht në rrugën e Farkëtarëve, e cila është e rezervuar vetëm për këmbësorë, nën udhëheqjen e diletantëve hyjnë edhe automjetet e rënda si ekskavatorë dhe kamionë.
Rruga e Farkëtarëve projekt të cilin e ka realizuar qeverisja e Partisë Demokratike e Kosovës, duke i dhënë jetë rrugës dhe duke i integruar dy anët e Qendrës Historike të Prizrenit, sot është shndërruar në një punishte të mjeteve të rënda. Projekti i rrugës së Farkëtarëve ka zgjeruar hapësirën dhe shëtitoren për këmbësorë, duke i bashkuar natyrshëm dy brigjet e Lumëbardhit, kurse sot jo që nuk e kryen më këtë funksion, por rrezikon që të shkatërrohet në tërësi nga mosndërhyrja i autoriteteve përgjegjëse të Komunës së Prizrenit.
Të gjitha veprimet që po ndodhin këto ditë janë në kundërshtim me Nenet 6 dhe 12 tëLgjitNr. 04/L-066 për Qendrën Historike të Prizrenit, Planin e Konservimit si dhe Planin e menaxhimit tw QHP-së.
Partia Demokratike e Kosovës, Dega Prizren dënon ashpër mosveprimin e pushtetit lokal, dora e të cilit është inekzistente në mbrojtjen e vlerave të zonës historike dhe kryeqytetit kulturor të Kosovës.
Bëjmë thirrje tek të gjithë OJQ-të, të cilat në këto momente janë bërë të shurdhëta dhe nuk po i dalin në mbrojtje vlerave historike të Prizrenit. Kërkojmë nga organizatat ta ngritin zërin kundër këtyre veprimeve të paligjshme të Komunës së Prizrenit, që po e degradojnë qytetin, kurse nga sovrani kërkojmë ndëshkimin e këtyre injorantëve më 6 tetor.
Ata të cilët nuk kanë kapacitet ta qeverisin Prizrenit, në asnjë mënyrë nuk munden e nuk dinë ta qeverisin Kosovën.
