Sot shënohet përvjetori i lindjes së një prej figurave më të rëndësishme të kulturës shqiptare, Jeronim de Rada, poeti, publicisti dhe mendimtari arbëresh që u bë një prej pishtarëve të Rilindjes Kombëtare.
I lindur më 19 nëntor 1814 në Makia të Kalabrisë, de Rada mbeti përjetësisht i lidhur me gjuhën dhe identitetin shqiptar, të cilat i mbrojti e i ngriti në piedestal në një kohë kur vetëdija kombëtare ishte ende e brishtë. Ai i përket brezit të intelektualëve arbëreshë që ruajtën gjuhën, zakonet dhe ndjenjën e përkatësisë, duke u bërë urë e fortë lidhëse mes komuniteteve arbëreshe dhe shqiptarëve në trojet e tyre, shkruan KultPlus.
Vepra e tij më e njohur, “Këngët e Milosaos”, është konsideruar një ndër gurët themeltarë të letërsisë sonë, e shkruar me një gjuhë të pasur, lirike dhe tërësisht të veçantë. Përmes saj, de Rada solli një dimension të ri poetik dhe një vizion modern për kohën, duke ndikuar thellësisht tek brezat e mëvonshëm të rilindasve.
Përveç krijimtarisë letrare, Jeronim de Rada u angazhua edhe si publicist dhe botues, duke themeluar gazetat e para arbëreshe që promovonin kulturën, gjuhën dhe çështjen shqiptare. Ai mbeti gjithmonë një zë i paepur në mbrojtje të kombit dhe një figurë kyçe në formësimin e ideve të Rilindjes Kombëtare.
Sot, de Rada kujtohet si simbol i përkushtimit, dijes dhe dashurisë së pakushtëzuar për gjuhën shqipe. Trashëgimia e tij vazhdon të jetë burim frymëzimi për studiues, krijues dhe të gjithë ata që e njohin rëndësinë e arbëreshëve në historinë e kulturës shqiptare.
Jeronim de Rada mbetet një emër i pashuar në kujtesën historike, një poet që i fali kombit një zë të ri dhe të pavdekshëm/