Pak qytetarë kanë dalë të dielën për të shijuar natyrën në Prevallë.
Ky vend turistik, në orët e mesditës, ka qenë pikë ndalese kryesisht për grupe motoristësh që kanë qarkulluar si nga drejtimi i Ferizajt, ashtu edhe nga drejtimi i Prizrenit.
Banorët e këtij fshati turistik kanë bërë të ditur se zbatimi i masave kundër përhapjes së pandemisë, tok me respektimin e rregullave të muajit të Ramazanit, kanë bërë që pak vizitorë t’ia mësyjnë natyrës, raporton KOHA.
Banori dhe pronari i një biznesi në Prevallë, Faton Morina, ka pohuar se masat e izolimit, si dhe patrullimet e rregullta të Policisë, kanë pamundësuar grumbullimin e njerëzve.
“Policia nuk po i lejon, është non-stop në vëzhgim këtu”, ka thënë ai.
Sipas tij, kjo situatë ka sfiduar bizneset që operojnë në këtë pikë turistike.
“Si biznes është shumë e vështirë. Ne varemi prej këtij biznesi prandaj është shumë problem”, ka vazhduar Morina.
Morina ka theksuar se janë në pritje të kalimit në fazën e dytë të masave lehtësuese.
Në anën tjetër, autoritetet komunale kanë bërë të ditur se në Komunën e Prizrenit vazhdojnë të jenë 47 raste të të infektuarve me koronavirus.
Drejtori i Shëndetësisë atje, Visar Shehu, ka bërë thirrje që qytetarët të kenë durim edhe pak dhe t’i respektojnë masat e Ministrisë së Shëndetësisë dhe rekomandimet e IKSHPK-së.