Kryetari i Prizrenit, Mytaher Haskuka, së bashku me drejtoreshën e Drejtorisë Komunale të Arsimit, Xhemile Thaçi Vezgishi, vizituan shkollën “Abdyl Frashëri”, për ta përcjellë nga afër mbarëvajtjen e afatit të dytë të Provimit të Maturës Shtetërore 2021, i cili u mbajt në përputhje me rekomandimet e Ministrisë së Arsimit, Shkencës, Teknologjisë dhe Inovacionit (MASHTI).
“Në komunën tonë, provimi i Maturës Shtetërore u organizua në 6 shkolla të qytetit duke përfshirë 663 maturantë, ku nga ata 567 ishin të komunitetit shqiptar, 82 të komunitetit boshnjak si dhe 14 komunitetit turk”, tha Haskuka.
“Duke marrë parasysh situatën e pandemisë, në përputhje me rekomandimet e Institutit Kombëtar të Shëndetësisë Publike të Kosovës (IKSHPK), provimi i maturës është organizuar në atë mënyrë, që të ketë numër sa më të vogël të kandidatëve brenda një qendre të testimit dhe brenda klasave të testimit, ku numri maksimal i nxënësve në një klasë është 15”.
“Gjithashtu, është siguruar prezenca e ekipit të Emergjencës dhe Shërbimit Policor të Kosovës, të cilët janë në gatishmëri për çdo eventualitet ose në rast të ndonjë nevoje eventuale gjatë mbajtjes së testit”.
“Ndërkaq, komisionet e përcaktuara nga MASHTI si dhe DKA-ja, të cilët po monitoronin procesin e testimit, na njoftuan se çdo gjë është duke shkuar sipas planifikimit dhe nuk ka asnjë parregullsi”.
“Uroj të kenë sukses nga ky testim të gjithë maturantët që u testuan sot dhe shpresoj që rezultatet të jenë sa më të mira”. /PrizrenPress.com/