Në Prizrenin e vjetër që po humbet dita-ditës, në mes të ndërtesave të reja, gjendet një shtëpi monumentale. Është shtëpia e familjes Xhejshylmedine, ajo që shtrihet në dy skaje të një udhëkryqi rrugicash, në thellësi të Qendrës Historike të Prizrenit. Jo shumë larg saj, ndodhet monumenti i Kosovës që mbrohet nga UNESCO, Kisha e Shën Premtes.
Aty jetojnë vëlla e motër të familjes Xhejshylmedine. Ata ruajnë shumë kujtime që lidhen me shtëpinë, me turistët e shumtë që dikur vinin për të parë Kishën, e për Prizrenin në përgjithësi. E përveç kësaj, të dy ruajnë edhe gjëra të shumta me vlerë monumentale, shkruan Koha Ditore.
Enët e trashëguara përbëjnë thesar të çmuar të artefakteve të familjes. E një listë e gjatë prej rreth 150 veglash e instrumentesh elektronike të llojllojshme ruhen nëpër paketa nga fizikani e kimisti i familjes.
Aset i rëndësishëm arkitektonik e kulturor
Në hajatin e bukur, të stërmbushur me lule, qëndrojnë edhe tri karrige të vogla prej druri. E ulur në njërën prej tyre, zonja e shtëpisë nis të rrëfejë për të kaluarën. Thotë se shtëpia është së paku 250 vjet e vjetër. “Datën e saktë nuk e di. Por gjyshi nuk e ka ndërtu këtë shtëpi. Nuk po e dimë nëse e ka ndërtu stërgjyshi apo ndonjë para tij”, thotë ajo…