Zyra e vendit në Lagjen e Trimave (ish-Tusuzi) në Prizren ka dy vjet që nuk është vënë në funksion nga administrata komunale, përkundër faktit që për ndërtimin e këtij objekti janë harxhuar mjetet nga buxheti komunal, shkruan Koha Ditore.
Madje në vitin 2012 kryetari i Komunës, Ramadan Muja, ka raportuar se kjo zyrë është hapur me qëllim të ofrimit të shërbimeve më cilësore për qytetarët e kësaj ane.
“Për të rritur kualitetin e shërbimeve, Drejtoria e Administratës ka hapur Zyrën e vendit edhe në Lagjen e Trimave”, thuhet në raportin e punës të Mujës, të nënshkruar në dhjetor të 2012-s.
Mirëpo banorët e lagjes, sikurse edhe zyrtarët e lartë të administratës komunale, kanë bërë të ditur se objekti i Zyrës së gjendjes civile asnjëherë nuk është funksionalizuar e as që ka ofruar dokumentet e duhura për komunitetin.