Fizarmonicisti i tri regjimeve, maestro Rexhep Karaçi, ka vdekur të premten (dje) në Prizren. Ai ka qenë në moshën 87-vjeçare, duke lënë pas vetes një karrierë të bujshme prej muzikanti, që ka zgjatur më se shtatë dekada. Mjeshtri Karaçi njihej edhe si fizarmonicisti i parë Radios së Prizrenit, respektivisht Prishtinës.
“Prizreni dhe Kosova kanë humbur një person me kulturë të lartë, një mjeshtër të vërtetë të muzikës që rrjedh nga një familje me traditë muzikore dhe i cili ka qenë i respektuar kudo ku ka bërë muzikë”, ka thënë violinisti Kastriot Marku, me të cilin Karaçi ka bashkëpunuar prej viteve ‘90, shkruan Koha Ditore.
Sipas tij, kultura muzikore e Prizrenit ka mbetur pa një margaritar, pasi që maestro Karaçi ka qenë një fizarmonicist i kalibrit të lartë, që gjatë 70 vjetëve të aktivitetit ka bashkëpunuar me emra të njohur të muzikës vendore e ndërkombëtare.