Gjatë ditës së sotme, në rajonin e Prizrenit janë sekuestruar dy armë zjarri.
Rasti i parë ka ndodhur rreth orës 14:40 minuta, në rrugën “Jusuf Gërvalla” në Prizren.
“Policia në Prizren pasi kishte pranuar një informatë e cila bënte me dije se një qytetar që po e drejtonte një automjet të llojit “Audi”, posedonte armë zjarri, dhe i njëjti është ndaluar në rrugën “Ismail Kryeziu”. Gjatë kontrollit të veturës është gjetur një pistoletë e llojit TT me 13 fishekë”, njofton Policia në Prizren.
I dyshuari është dërguar në stacion policor për t’u pyetur për armën, ndërsa pas procedurave është lënë i lirë. Shkresat e lëndës dhe provat materiale i kalojnë prokurorisë së shtetit për procedurë të më tejme.
Ndërkaq, rasti i dytë, ka ndodhur në fshatin Brestovc të Rahovecit.
Sipas policisë së Rahavecit, thuhet se Policia kishte dijeni se një i dyshuar posedonte armë dhe për këtë kishin siguruar miratimin e gjykatës për bastisjen e shtëpisë së të dyshuarit. Gjatë bastisjes, është gjetur një pistoletë TT me tetë fishekë që e mbante në brez i dyshuari.
Në konsultim me prokurorin e shtetit i dyshuari është liruar në procedurë të rregullt. /PrizrenPress.com/