Reshjet e borës kanë shkaktuar probleme në qarkullim, në rrugët e rajonit të Prizrenit, kryesisht në zonat malore.
Zyrtarët e Komunës së Malishevës kanë raportuar se reshjet e shumta të borës në 24 orët e fundit kanë shkaktuar probleme në qarkullim, në disa rrugë në territorin e kësaj komune. Sipas drejtorit të Drejtorisë së Shërbimeve Publike, Milazim Morina, ekipet janë në terren, por rënia e vazhdueshme e borës është duke shkaktuar probleme, përfshirë edhe ofrimin e shërbimit të grumbullimit të mbeturinave, shkruan sot Koha Ditore.
Drejtori Morina përmes njoftimit të ZI-së ka bërë të ditur se kompania për mirëmbajtjen e rrugëve gjatë dimrit, është në terren dhe po bën pastrimin e rrugëve nga bora, mirëpo reshjet e vazhdueshme po e vështirësojnë mirëmbajtjen e rrugëve. Sipas tij, gjendja më e rënduar është në fshatrat e thella malore, sidomos në fshatrat që shtrihen përgjatë maleve të Berishës.