Ish-ambasadori gjerman në Kosovë, Ernst Reichel dhe ministri i Pushtetit Lokal, Slobodan Petroviç, deklaruan të mërkurën se janë kundër një liste të vetme zgjedhore për serbët e Kosovës.
Reichel tash i dërguari special i Gjermanisë për Evropën Juglindore, Turqinë dhe shtetet e EFTA-s, i ka ftuar serbët e Kosovës që të marrin pjesë në zgjedhjet e 3 nëntorit.
Mirëpo, Reichel nuk e ka quajtur zgjidhje të mirë pjesëmarrjen e serbëve në zgjedhjet lokale me një listë të vetme zgjedhore. Madje, ai ka thënë se ajo listë, ia kujton Gjermaninë Lindore, transmeton RTK.
Përderisa fton serbët, që jetojnë në pjesën veriore të Kosovës, të marrin pjesë në zgjedhjet lokale, ish ambasadori gjerman, Ernst Reichel thotë se pjesëmarrja e serbëve me një listë të vetme zgjedhore ia kujton atij ditët e Gjermanisë Lindore.
“Unë nuk mendoj se lista e unifikuar serbe do të jetë rezultati përfundimtar. Nëse ata mund të ofrojnë vetëm një zgjidhje të vetme për qytetarët e Kosovës atëherë kjo më përkujton mua ditët e Gjermanisë Lindore ku ka qenë vetëm një listë zgjedhore. Por, unë mendoj se kjo nuk do të ndodhë”.
Këto deklarata ish ambasadori Reichel i bëri pas takimit që kishte me ministrin e Pushtetit Lokal, Slobodan Petroviç. Për ministrin Petroviç, e rëndësishme është që në këtë proces zgjedhor të marrin pjesë sa më shumë njerëz që është e mundur dhe ata votues të kenë një ofertë politike sa më kualitative. Prandaj, ai thotë se është mirë që serbët të kenë sa më shumë subjekte politike, të cilët do të garojnë në zgjedhje.
”Mendoj se pjesëmarrja me një listë nuk do të thotë se mund të sjellë më shumë vota. Pra, ky aktivitet është i orientuar nga individë pa vizion politik, pa program politik dhe pa ndonjë rezultat politik nga e kaluara. Sidoqoftë, ky është një proces zgjedhor dhe fjalën për këtë do ta kenë qytetarët tanë”, deklaroi ai.
Sipas ministrit Petroviç, paralajmërimi për një listë të vetme të serbëve në zgjedhjet e nëntorit nuk është ndoshta kundër demokracisë dhe arsyes së shëndoshë, meqë nuk është referendum por janë zgjedhje lokale që merren me çështje lokale.
Ai po ashtu përmendi se në ciklin e kaluar zgjedhor ka ekzistuar e ashtuquajtura Listë e njësuar zgjedhore serbe, e cila ka marrë vota tre herë më pak se kandidatët që kanë garuar përmes partive të ndara politike.