Lëvizja Vetëvendosje! sot ka vizituar drejtuesit e Festivalit të Filmit Dokumentar “Dokufest” në Prizren. Në këtë takim është diskutuar për kulturën në Prizren si dhe alternativat për zhvillimin e mëtutjeshëm të saj.
Kandidati i VV-së për kryetar te Prizrenit, Arbër Rexhaj tha se “Dokufesti” është shembulli më i mirë se si një iniciativë dhe organizim i mirë i artdashësve, mund të krijoj ngjarje të mëdha kulturore nga të cilat përfiton komuniteti i gjerë.
“Fakti se vetëm brenda 7 ditëve Prizreni përfitoi mbi 3 milion euro, është tregues se kultura tashmë nuk është luks i panevojshëm, por potencial kryesor për zhvillim ekonomik në qytet. Prandaj Lëvizja Vetëvendosje! konsideron se përgjegjësia dhe mbështetja institucionale për aktivitetet dhe ngjarjet kulturore duhet të konsiderohet si obligim, duke i pasur parasysh edhe detyrimet ligjore të pushtetit lokal në zhvillim ekonomik lokal”, tha Rexhaj.
Ndërkaq, drejtuesit e “Dokufest”-it Veton Nurkollari dhe Eroll Bilibani thene se është e pamjaftueshme vetëm sigurimi i infrastrukturës për zhvillimin e aktiviteteve pa ndonjë politikë publike kulturore që do të stimulonte prodhimin kulturor.
“Duke u nisur nga nevoja për zhvillim të aktiviteteve, ndërtimi i kinemave funksionale tashmë është çështje e domosdoshme”./PrizrenPress.com/