Sindikata e Arsimit ka adresuar një Këshillë publike institucioneve qendrore e lokale të Kosovës.
“Qasja e gabuar ndaj problemeve nuk sjell zgjidhje të tyre”, thuhet në komunikatën e dërguar nga kjo sindikatë, të nënshkruar kreu i SBASHK-ut Rrahman Jasharaj.
“Të nderuarit përfaqësues të institucioneve qendrore e lokale të pushtetit, e di se kjo këshillë imja nuk do Ju pëlqej, por po ua them publikisht. Ju keni qasje të gabuar ndaj problemeve ekzistuese e reale dhe prandaj kjo qasje edhe nuk sjell zgjidhjen e tyre. Ju kujtoj se Kontrata Kolektive e sektorit të Arsimit Parauniversitar është nënshkruar në prillin e vitit 2014 dhe ishte marrëveshje që për shkak të mos planifikimeve buxhetore të pritej janari i vitit 2015 për t’u bërë këto planifikime. Planifikimet, po thoni , nuk janë bërë dhe kjo ishte qasje e gabuar”, ka thënë Jasharaj.
Ai bënë të ditur se personalisht me me stafin e tij udhëtoi komunë me komunë dhe u takua me drejtorët e DKA-ve që në verë duke alarmuar se janari po vjen dhe se duhet përgatitur për implementimin e Kontratës Kolektive.
“Ata pohuan me kokë dhe e lan me aq. Qasje e gabuar. Ju kujtoj se u zhvilluan takime e takime me qeveritarë të lartë dhe SBASHK-u alarmoi për gjendjen dhe e tha troç se po nuk u zbatua Kontrata Kolektive nga 10 janari do të ketë veprime të përshkallëzuara sindikale. Institucioneve qendrore e lokale nuk u kishte lënë përshtypje kjo. Qasje e gabuar. Erdhi e marta dhe greva njëorëshe nisi në shkollat fillore e të mesme të Kosovës. Mbi 95 për qind e institucioneve arsimore të Arsimit Parauniversitar respektuan kërkesën e tyre të përforcuar me nënshkrime. MASHT në komunikatën e vet përmend disa shkolla që nuk ishin në grevë , por pranë atij numri është dashur të cek sa institucione shkollore iu përgjigjen grevës. Qasje e gabuar”.
SBASHK apelon që Institucionet qendrore e lokale duhet ta kuptojnë seriozisht situatën dhe të ulen e të gjejnë zgjidhje.
“Implementimi i plotë i Kontratës duhet të ndodh dhe duhet të gjenden mjete se nuk janë shumë dhe nuk kërkohet të ndahen të gjitha për një herë , por pjesë- pjesë sipas muajve të vitit. Institucione qendrore e lokale ndërrojeni qasjen ndaj këtij realiteti. Angazhohuni sinqerisht dhe zgjidhje ka dhe është e lehtë. Nëse vazhdoni me avazin e vjetër mos harroni se qasja e gabuar ndaj problemeve nuk sjell zgjidhjen e tyre. Mos harroni se problemet mund të trashen. Mos harroni se SBASHK-u deri në implementimin e plotë të Kontratës Kolektive do të vazhdojë me veprimet sindikale sepse kjo është e drejtë e garantuar me ligjet gjegjëse të Kosovës dhe me Konventat Ndërkombëtare”, thuhet në këshillën e Jasharaj, drejtuar institucioneve.