Ish presidenti i Kosovës dhe ish kryetari i Lidhjes Demokratike të Kosovës, Fatmir Sejdiu, sërish ka reaguar lidhur me deklaratat e Isa Mustafës, kryetarit aktual të LDK-së, se këta të dy, janë takuar dhe kanë biseduar vazhdimisht lidhur me listën e LDK-së që do të marr pjesë në zgjedhjet qendrore.
Sejdiu, në një njoftim shkruan, se Mustafa, asnjëherë nuk ka të drejt t’ia përmend emrin e tij, e aq më pak në rastet kur ai i shmanget të vërtetës, ngase sipas Sejdiut, këta dy të fundit nuk janë takuar për një vit e gjysmë.
“Isa Mustafa nuk ka të drejtët përmend emrin tim duke shmangur të vërtetën se ai asnjëherë që nga fillimi i vitit 2013, pra gati një vit e gjysmë, nuk ka pasur asnjë takim dhe as bisedë me mua. Konteksti dhe nënteksti në të cilin e thotë ai këtë, konstatimishtë i pavërtetë, i pasinqertë dhe manipulues. Edhe me këtë rast, sikur në një paraqitje të mëparshme (të shtunën) ku kam sqaruar qëndrimin tim lidhur me zgjedhjet e 8 qershorit, kam kërkuar që emri im të mos përmendet në kontekste manipuluese, aq më pak për të paracaktuar qëndrimet e mia, që janë shumë të njohura për anëtarësinë e gjerë të LDK-së. Këtë qëndrim ma konfirmon edhe komunikimi masiv gjatë këtyre ditëve me shumë anëtarë të LDK-së, brenda e jashtë Kosovës, komunikim që do ta vazhdojë edhe në të ardhmen”, shkruan Sejdiu.
Ndryshe, të dielën Isa Mustafa, ka theksuar se e ka mirëkuptuar vendimin e ish-Presidentit të Kosovës dhe Kryetarit të nderit të LDK-së, Fatmir Sejdiu për të mos u përfshirë në listën e kandidatëve të kësaj partie për deputetë, por ka theksuar se beson në angazhimin e Sejdiut për fitoren e LDK-së në zgjedhjet e 8 qershorit.
“Ju e dini tashmë se ne kemi biseduar vazhdimisht me Sejdiu. Edhe dje kam biseduar dhe e kam kuptuar arsyetimin e tij për të mos qenë pjesë e listës për deputetë të LDK-së. Ne ia kemi rezervuar vendin e 4 në listë, sepse në vendin e parë kam qenë unë si kryetar, në të dytin nënkryetari i parë i LDK-së, ndërsa vendi i tretë është i rezervuar për një grua”, ka thënë Mustafa.
Ndryshe, muaj m ë parë, këshilli i përgjithshëm i LDK-së, me 99 vota pro ka vendosur që për nominimin e Isa Mustafës për Kryeministër të ardhshëm të Kosovës. Ndërsa, vota e vetme kundër ishte ajo e ish kreut të LDK-së, Fatmir Sejdiut, i cili pati vlerësuar se ka pasur kandidatura tjera edhe më të mira për të nominuar për kryeministër.