Organizuar nga OSBE misioni në Kosovë, dhe përkrahur nga Komuna e Malishevës, sot është mbajtur një seminar, me temën “Rritja e bashkëpunimit në mes të Këshillit Komunal për Siguri në Bashkësi (KKSB), Komiteteve Lokale të Sigurisë Publike (KLSP) dhe Policisë së Kosovës”, e ku morën pjesë, kryetari i Malishevës, Ragip Begaj, me zyrtarët përkatës, pastaj Erduan Gjiglli nga OSBE, Rifat Marmullaku-OSBE, Fatmir Limani nga Policia e Kosovës, Ganimete Gerboci nga MPB-ja, dhe komandanti dhe zv/komandanti i stacionit policor në Malishevë, Halil Morina dhe Bekim Begaj.
Në këtë seminar, u fol për zhvillimet në sektorin e sigurisë, në veçanti bashkëpunimin mes KKSB-së me organizmat tjerë, si dhe për nevojën e formimit të Komitetit Lokal për Sigurinë Publike. Përderisa siguria e përgjithshme, u vlerësua e mirë në Malishevë, u tha se parandalimi është masa më e mirë për ruajtjen e sigurisë.
“Është shumë e nevojshme rritja e këtij bashkëpunimi, pasi kemi nevojë që siguria të rritet edhe më shumë në Komunën e Malishevës dhe ndarja e praktikave të mira është shumë e nevojshme” tha në fjalën e tij kryetari Begaj.
Ndërsa për Erduan Gjiglli, nga OSBE, gjithashtu tha se “Ndarja e praktika të mira është me rëndësi sikur edhe rritja e bashkëpunimit mes personave profesional në fushën e sigurisë”.
“Siguria është një problem kompleks, pasi pa bashkëpunim të mirë me komunitetin, nuk mund të arrihet edhe nivel i lartë i sigurisë në bashkësi”, tha Fatmir Limani nga Policia e Kosovës, i cili më pas edhe paraqiti disa nga faktorët që ndikojnë në prishjen e sigurisë dhe nevojën për formimin e KLSP-ve.
Për qëllimin e seminarit, për forcimin komunikimit mes KKSB-ve, KLSP-ve dhe policisë, si dhe për rolin e KLSP-ve dhe EVSB-ve në KKSB, ka folur, Rifat Marmullaku, nga OSBE-ja.